المجد للمندسّين

نحن نزلنا رسمنا هيدي الرسمة تالت نهار بعد ما كانوا اول نهارين بالثورة مليانين أعمال شغب وقطع طرقات. ونحن كنا عم ننزل أول نهارين وعم نعيش الخوف والفرح والحماس وكل المشاعر المتناقضة وهيك الثورة بلشت. استوحينا الفكرة دغري من الواقع فا يوسف تلّيه نقى يرسم كاركتير بلا كنزة لأن بيمثل أغلب الشباب يلي عملوا شغب وكانوا يلبسوا ماسك من الفيلم المشهور بالثورة وهني استعملوه ليخبوا هويتن حفاظا ع سلامتن وللبعد الثوري كمان. أنا رسمت فتاة مخبية وجها، ونحن منعرف انو اكيد العالم حتقول ما حيكون في بنات لانو البنات أنعم ويمكن يخافوا فا ما ح ينزلوا. بس بالعكس أنا شخصيا كنت عم بركض وأهرب مع كتير بنات التقى فيها تحت وكنا عم نخبي وجنا عشان القنابل المسيلة للدموع يلي كانت عم تنرمى علينا. وأخيرا ابراهيم تلّيه رسم علامة النصر.

كتبنا المجد للمندسين بين هيدول الكاركتيرز عشان نحن نأمن بأنو هيدول العالم أو نحن هني عالم غاضبة من السلطة صرلها وقت طويل، ونزلت انتقمت منها بالتكسير وقطع الطرقات، فا عملنا منهن ايقونات ونحن مع هيدا الشي، لأنو هيدي وسائل احتجاج بتوصل رسالة قوية للسلطة وبتخوفها. وهيدول العالم هني يلي اشعلوا الثورة. والمضحك بالموضوع لما يقولوا العالم المعادية لهيدي التصرفات انو لازم نكون حضاريين بتظاهراتنا فا هني حتما ما شافوا شي من التظاهرات الثورية المغيرة عنجد. بعد كل الأفعال والاحتجاجات يلي صارت ببيروت، اتهمنا انو نحن مندسين. الشعب يلي محروم أدنى مقومات الحياة هو مندس. فا اجى الرد برسمة الغرافيتي يلي بتحمل رسالة المجد للمندسين.